चिपळूण (वार्ताहर) : खेड पंधरागाव विभागातील वावे गावचा सुपुत्र बॉडी बिल्डर रियाज चौगुले याने शरीरसौष्ठव निवड चाचणी स्पर्धेत आपल्या पिळदार शरीरयष्टीच्या जोरावर रत्नागिरी जिल्हा हौशी शरीर सौष्ठव स्पर्धेतील मानाचा “रत्नागिरी श्री” हा किताब पटकाविला आहे. त्यामुळे त्याला आता राज्यस्तरावर आपला खेळ दाखविण्याची संधी उपलब्ध झाली आहे.
आदर्श क्रीडा व सामाजिक प्रभोधिनीच्या माध्यमातून व रत्नागिरी जिल्हा हौशी शरीरसौष्ठव संघटनेच्या मान्यतेने या स्पर्धा काविळतली चिपळूण येथे आयोजित करण्यात आली होती. या स्पर्धेसाठी राष्ट्रीय पंच, राष्ट्रीय प्रशिक्षक तसेच अंतराष्ट्रीय प्रशिक्षक देखील उपस्थित होते. या स्पर्धेमध्ये मोठ्या प्रमाणात स्पर्धकांनी सहभाग घेतला होता. विविध गटांमध्ये या स्पर्धा घेण्यात आल्या. यामध्ये रियाजने “रत्नागिरी श्री” हा मानाचा किताब पटकाविण्यात यश मिळविले आहे. रियाजने आपला हा विजय नुकत्याच निधन झालेल्या आपल्या वडिलांना समर्पित केला आहे. आपल्या या यशामध्ये आई-वडील, कुटुंबिय व आंतरराष्ट्रीय कोच नंदू शिदे यांचा मोलाचा वाटा असल्याचे त्याने म्हटले आहे. रियाज चौघुले हा पत्रकार इकबाल चौघुले यांचा पुतण्या असून “रत्नागिरी श्री” हा शरीर सौष्ठव स्पर्धेतील मानाचा किताब त्याने पटकाविल्याबद्दल त्याच्यावर विविध स्तरातून अभिनंदनाचा वर्षाव होत आहे.
