चिपळूण : शहरातील गजबजलेल्या बाजारपेठ परिसरात आज रविवारी दुपारी भरधाव वेगाने आलेल्या एका दुचाकीस्वाराने सायकलवरून जाणाऱ्या मजूर व्यक्तीस जोरदार धडक दिली. धडक इतकी तीव्र होती की दुचाकीचे मडगार्ड तुटून तब्बल १५ फूट लांब उडाले. मोठा आवाज झाल्याने परिसरातील व्यापारी आणि नागरिक घटनास्थळी धावून आले.
अपघातानंतर संबंधित दुचाकीस्वार थांबण्याऐवजी धूम स्टाईलने वेगाने पळून गेला. रस्त्यावर उपस्थित नागरिकांनी आणि व्यापाऱ्यांनी त्याला थांबवण्याचा प्रयत्न केला, मात्र तो भरधाव वेगाने पसार झाला. अपघातग्रस्त मजूर इसमाच्या नाकातून व तोंडातून रक्तस्राव होत होता. व्यापारी अरुण भोजने व अन्य व्यापाऱ्यांनी तात्काळ त्याला उचलून सुरक्षित बाजूला केले. यानंतर पोलिसांच्या हेल्पलाइन नंबरवर संपर्क साधण्यात आला. काही वेळातच पोलीस घटनास्थळी दाखल झाले आणि जखमी मजुराला तातडीने हॉस्पिटलमध्ये दाखल करण्यात आले. सध्या त्यांच्यावर उपचार सुरू असून ते ॲडमिट आहेत. पोलीस घटनास्थळावरील सीसीटीव्ही फुटेज तपासत असून दुचाकीस्वाराची ओळख पटवण्याचे काम सुरू आहे. फुटेजमध्ये आरोपी स्पष्ट दिसत असल्याची माहिती मिळाली आहे. पोलिसांकडून योग्य ती कारवाई केली जाईल, अशी अपेक्षा व्यक्त करण्यात आली आहे. दरम्यान, चिपळूण शहरात विशेषतः बाजारपेठ परिसरात धूम स्टाईलने वाहन चालवण्याचे प्रकार वाढले असून अपघात झाल्यानंतर मदत न करता पळून जाण्याची गंभीर बाब समोर येत आहे. अशा बेदरकार चालकांवर कठोर कारवाई करून याला आळा घालावा, अशी मागणी नागरिक व व्यापाऱ्यांकडून केली जात आहे
