*शृंगारतळी बाजारपेठेत चोरट्यांनी ज्वेलरी दुकान फोडले*

गुहागर (प्रतिनिधी) : तालुक्याची आर्थिक राजधानी असलेल्या शृंगारतळी बाजारपेठेतील ज्वेलरी दुकान मध्यरात्री अज्ञात चोरट्याने फोडल्याने एकच खळबळ उडाली आहे. मध्यरात्री दीड वाजताच्या सुमारास ही चोरी झाल्याची सीसीटीव्ही फुटेज वरून लक्षात येत आहे. या चोरीमध्ये चोरट्यांनी सोन्याचे दागिने केले लंपास केले.
गुहागर तालुक्यातील मध्यवर्ती बाजारपेठ असलेल्या शृंगारतळी बाजारपेठेत ओंकार ज्वेलर्स या ज्वेलरी दुकानातील सोन्याचे दागिने अज्ञात चोरट्याने मध्यरात्री चोरीस नेले. दरम्यान, दुकानातले लॉकर फोडण्याचा चोरट्यांचा प्रयत्न फसला. त्यामुळे व्यापाऱ्याचे लाखो रुपयांचे नुकसान सुदैवाने टळले. शृंगारतळी येथील ओंकार ज्वेलर्समधील दागिने लंपास करण्याचा प्रयत्न करताना चोरांनी सीसीटीव्हीवर काळ्या रंगाचा स्प्रे मारल्याचे देखील स्पष्ट झाले आहे. मुख्य बाजार पेठेतील ओंकार ज्वेलर्स हे ज्वेलरीचे दुकान फोडण्याचा प्रयत्न झाल्याने बाजारपेठेत एकच खळबळ उडाली आहे. गुहागर पोलिसांकडून या चोरीचा तपास सुरु असून चोरी करतानाचे सीसीटीव्ही फुटेज समोर आले आहेत. चेहरा न लपवता चोरांचा चोरीचा प्रयत्न झाल्याचे सीसीटीव्ही फुटेजवरून स्पष्ट होत आहे. दरम्यान, शृंगारतळी बाजारपेठेत गोविंदा मोबाईल शॉपी नंतर मध्यरात्री घडलेल्या या घटनेने पुन्हा एकदा भीतीचे वातावरण निर्माण झाले आहे.